بانک مرکزی افغانستان تحت کنترل گروه طالبان، از ممنوع کردن فعالیت صرافی‌های سیار (دست‌فروش)، یا بدون جواز در سرای «شهزاده» شهر کابل خبر میدهد.
نماینده‌گان بانک مرکزی افغانستان، وزارت داخله و ریاست عمومی استخبارات گروه طالبان، روز دوشنبه ۱۸ سرطان، فعالیت صرافی‌های سیار (دست‌فروش) در سرای «شهزاده» شهر کابل را منع کرده غرفه‌های صرافان در بیرون از سرای را نیز مهر و لاک کرده‌اند.
براساس اطلاعات منابع، این تصمیم از دیروز دوشنبه ۱۸ سرطان، عملی شده و فعالیت صرافی‌ها در سرای «شهزاده» متوقف گردیده است.
حسیب‌الله نوری، سخن‌گوی بانک مرکزی افغانستان نیز گفته است تمام صرافی‌های که جواز قانونی دارند به فعالیت شان مثل سابق ادامه دهند. اما آنعده صرافی‌های سیاری که جواز فعالیت ندارند، تا جواز فعالیت دریافت نکنند نمی‌توانند کار کنند.
گفتنی‌ست که گروه طالبان امروز سه‌شنبه ۱۹ سرطان، در قندهار نیز بیش از ۱۰۰ صرافی بدون «جواز» را مسدود کردند.
در حالیکه سطح بیکاری با آمدن دوباره گروه طالبان افزایش یافته و اکثریت جوانان در کشور با بی‌سرنوشتی و بیکاری دست‌وپنجه نرم میکنند.
خبرگزاری زنان افغانستان
- نویسنده : خبرگزاری زنان افغانستان
- منبع خبر : خبرگزاری زنان افغانستان
