خبرگزاری زنان افغان: په تېر حکومت کې د ولسی جرګې غړې ناهید فرید وایی، د طالبانو سختې تګلارې به د افغانستان راتلونکې له منځه یوسی. مېرمن فرید نن سهار “چهارشنبه، د حمل ۱۶مه” په یوه ټویټ کې لیکلی چې د مرستو په رسولو کې د ښځو ونډه ډېره مهمه ده او له دوی پرته به […]
خبرگزاری زنان افغان: په تېر حکومت کې د ولسی جرګې غړې ناهید فرید وایی، د طالبانو سختې تګلارې به د افغانستان راتلونکې له منځه یوسی.
مېرمن فرید نن سهار “چهارشنبه، د حمل ۱۶مه” په یوه ټویټ کې لیکلی چې د مرستو په رسولو کې د ښځو ونډه ډېره مهمه ده او له دوی پرته به خوښی ناشونې وی.
له بلې خوا د افغانستان د بشری حقونو د خپلواک کمیسیون پخوانی مشر شهرزاد اکبر هم د سرپرست حکومت دغه پریکړه غندلې او ویلی یې دی چې دا پریکړه وحشتناکه ده خو د حیرانتیا وړ نه ده.
مېرمن اکبر ټینګار وکړ، چې سرپرست حکومت لوږه تحمیلوی، خو د افغانستان امکانات او راتلونکې په خټو بدلوی.
د هغه په وینا، له ښځو پرته بشردوستانه مرستې ناشونې دی او له هغوى پرته افغانستان د بدبختۍ دوره نه شی ماتولی.
دغه راز د افغانستان د سولې په چارو کې د امریکا د بهرنیو چارو وزارت پخوانی استازی زلمی خلیلزاد وایی، د سرپرست حکومت له دې پرېکړې سره د دوحې له هوکړې سرغړونه شوې ده.
ښاغلی خلیلزاد په یو لړ ټویټونو کې لیکلی دی چې د افغانستان د ملګرو ملتونو په ادارو کې د ښځو د کار کولو د منع کولو د سرپرست حکومت پریکړه به د دغه هیواد د خلکو کړاوونه نور هم زیات کړی.
هغه ټینګار وکړ چې اوسنی حکومت د دوحې په تړون کې په افغانستان کې د ښځو د کار د دوام ژمنه کړې وه.
د افغانستان د سولې په چارو کې د امریکا د بهرنیو چارو وزارت پخوانی استازی زیاته کړه چې د اوسنی حکومت مشرانو په دې پرېکړه تېروتنه کړې او له دوی یې غوښتی چې د دوحې په تړون کې خپل مسوولیت ادا کړی.
له دې سره سره په تېر حکومت کې د ولسی جرګې غړې مریم سلیمانخېل د زلمی خلیلزاد خبرو ته غبرګون ښودلی او په خپل ټویټر کې یې لیکلی: “ښاغلی خلیلزاد، د اوسنی حکومت په کړنو د حیرانتیا جرات څنګه شو؟ دا ستاسو ګناه ده چې تاسو د خبرو اترو په جریان کې دوی ته مشروعیت ورکړ. افغان ښځې به ستا د بې کفایتۍ تاوان ورکړی.
هغه زیاته کړه: “ستاسو تشې خبرې به د هغوی [افغان میرمنو] حقوق او ژوند بیرته نه راولی.” وشرمیږه! “موږ حقیقی عمل غواړو، نه یوازې تش شعارونه.”
په همدې حال کې یوناما یا په افغانستان کې د ملګرو ملتونو د مرستندویه پلاوی دفتر ویلی چې په ننګرهار ولایت کې د سرپرست حکومت کسانو د دې ادارې د ښځینه کارکوونکو د کار مخه نیولې ده.
یوناما د سرپرست حکومت چارواکو ته ویلی چې د ملګرو ملتونو ادارې له ښځینه کارکوونکو پرته کار نه شی کولای او حیاتی مرستې ورته برابروی.
د سرپرست حکومت چارواکو تر اوسه په دې اړه څه نه دی ویلی.
په یوه لیک کې راغلی، چې سرپرست حکومت تېر کال ښځې په کورنیو او بهرنیو غیر دولتی موسسو کې له کار کولو منع کړې وې.
خبرگزاری زنان افغان
Recognize_Gender_Apartheid_in_Afghanistan#
